ប្រទេសចំនួន៥ ត្រៀមបញ្ជូនអត្តពលិក មកប្រកួតគុនល្បុក្កតោ ជាមួយម្ចាស់ផ្ទះកម្ពុជា ក្នុងស៊ីហ្គេម ឆ្នាំ២០២៣…

Khmer Make២ weeks ago

៣២

មកទល់នឹងពេលនេះ មានបរទេសចំនួន៥ បានចុះឈ្មោះចូលរួមប្រកួតគុនល្បុក្កតោក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះដែលជាប្រវត្តិសាស្ដ្រលើកដំបូង។

Thank you for reading this post, don't forget to subscribe!

លោក អ៊ួ តារា អគ្គលេខាធិការរង សហព័ន្ធកីឡាគុនល្បុក្កតោកម្ពុជា បានជាគូសបញ្ជាក់ថា ប្រទេសចំនួន៥ហើយ ដែលបានត្រៀមបញ្ជូនកីឡាករ កីឡាការិនីរបស់ខ្លួនចូលរួមប្រកួតកីឡាគុនល្បុក្កតោ ក្នុងស៊ីហ្គេម ឆ្នាំ២០២៣ ខាងមុខនេះ រួមមានប្រទេសវៀតណាម ឡាវ មីយ៉ាន់ម៉ា ហ្វីលីពីន និងឥណ្ឌូណេស៊ី រួមទាំងម្ចាស់ផ្ទះក្បាច់គុន និងជាម្ចាស់ផ្ទះ កម្ពុជា សរុបគឺ៦ប្រទេស។

«មុនឈានដល់ការប្រកួតធំនៃព្រឹត្តិការណ៍កីឡាស៊ីហ្គេម លើកទី៣២ នាខែឧសភា គឺម្ចាស់ផ្ទះកម្ពុជា គ្រោងនឹងរៀបចំព្រឹត្តិការណ៍ចំនួន២ គឺទី១ វគ្គបណ្តុះបណ្តាលអាជ្ញាកណ្តាលចៅក្រមអន្តរជាតិ គុនល្បុក្កតោ ពីថ្ងៃទី២៤ ដល់ថ្ងៃទី២៨ ខែមីនា ឆ្នាំ២០២៣។ បន្ទាប់មកយើងបន្តទៅរៀបចំការប្រកួតកីឡាគុនល្បុក្កតោ ជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ (The First Kun Borkator SEA Championship 2023) ដែលគ្រោងនឹងធ្វើពីថ្ងៃទី២៩ ខែមីនា ដល់ថ្ងៃទី០៣ ខែមេសា ឆ្នាំ២០២៣»។ នេះជាការបញ្ជាក់បន្ថែមរបស់ លោក អ៊ួ តារា។

ជាមួយគ្នានេះ លោកអគ្គលេខារងរូបនះក៏បានបន្ថែមទៀតថា ការរៀបចំវគ្គបណ្តុះបណ្តាល និងការប្រកួតជើងឯកអាស៊ីអាគ្នេយ៍ លើកទី១នេះ គឺពិតជាមានសារៈសំខាន់ណាស់ ដើម្បីត្រៀមខ្លួនឱ្យកាន់តែល្អប្រសើរ ក្នុងការត្រៀមខ្លួនឆ្ពោះទៅធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣។

គួរបញ្ជាក់ថា បញ្ជីវិញ្ញាសាដែលបានកំណត់ជាផ្លូវការលើប្រភេទកីឡាគុនល្បុក្កតោ ក្នុងប្រភេទយុទ្ធគុនចម្រុះ គឺមានចំនួន១៦វិញ្ញាសា ក្នុងនោះប្រភេទវិញ្ញាសាសម្តែងមានចំនួន៧ (ឯកត្តជន-ក្រុម) ខណៈវិញ្ញាសាប្រយុទ្ធមានចំនួន៩ រួមមានផ្នែកបុរសលើប្រភេទទម្ងន់ ៥០គ.ក ៥៥គ.ក ៦០គ.ក ៦៥គ.ក និង៧០គីឡូក្រាម។ រីឯផ្នែកនារី មានប្រភេទទម្ងន់ ៤៥គ.ក ៥០គ.ម ៥៥គ.ក និង៦០គីឡូក្រាម។

បើតាមប្រសាសន៍របស់ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា កាលពីពេលថ្មីៗនេះ បានគូសបញ្ជាក់ថា នៅក្នុងចំណោម៣៧ប្រភេទកីឡា ដែលរៀបចំដាក់ឱ្យប្រកួតកីឡាស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា គឺកម្ពុជាបានសម្រេចដាក់បញ្ជូលនូវប្រភេទកីឡាវប្បធម៌អត្តសញ្ញាណជាតិរបស់ខ្លួនចំនួន៣ ព្រោះនេះជាឱកាសមាស ក្នុងការបង្ហាញកីឡាប្រណៃណីទាំងនេះទៅកាន់អន្តរជាតិ ហើយប្រភេទកីឡាវប្បធម៌ប្រពៃជាតិទាំង៣នេះ គឺមានគុនល្បុក្កតោ គុនខ្មែរ និងអុកចត្រង្គ ដែលប្រជាពលរដ្ឋនិយមលេងក្នុងសង្គម។

ជាមួយការសម្រេចដាក់បញ្ជូលប្រភេទកីឡាគុនល្បុក្កតោ គុនខ្មែរ និងអុកចត្រង្គ ក្នុងព្រឹត្តិការណ៍ស៊ីហ្គេមនេះ ម្ចាស់ផ្ទះកម្ពុជា បានរៀបចំការប្រកួតជើងឯកអាស៊ីអាគ្នេយ៍រួចហើយ លើប្រភេទកីឡាគុនខ្មែរ និងអុកចត្រង្គ ខណៈគុនល្បុក្កតោ នឹងរៀបចំជើងឯកអាស៊ីអាគ្នេយ៍ នាចុងខែមីនា ឆ្នាំ២០២៣នេះ។ «ការធ្វើម្ចាស់ផ្ទះ គឺជាឱកាសបង្ហាញកីឡាវប្បធម៌អត្តសញ្ញាណជាតិ។ បើយើងមិនរៀបចំក្នុងនាមជាម្ចាស់ផ្ទះនោះទេ គឺយើងនឹងមិនមានឱកាសល្អបែបនេះទៀតទេ ពោលគឺដើម្បីអភិរក្ស និងការអភិវឌ្ឍ»។ ឯកឧត្តម វ៉ាត់ ចំរើន បានបញ្ជាក់ ហើយឯកឧត្តម ក៏ជាអគ្គលេខាធិការសហព័ន្ធកីឡាគុនល្បុក្កតោកម្ពុជា ផងដែរ៕